Ua talia e le faamasinoga le talosaga a le loia a le fofoga fetalai ina ia toe tolopo le iloiloga o le talosaga a le ta’ita’i ma le failautusi a le HRPP e faasaga i le Fofoga Fetalai ona o le fa’amalolo le tumau o i laua mai le palemene.
O le aso 31 o le masina fou ua toe tolopo iai iloiloga a le faamasinoga i le talosaga a le taitai o le itu agai Tuilaepa Sailele Malielegaoi ma le failautusi, Lealailepule Rimoni Aiafi, mo se faamalamalaga a i le faamasinoga, i le faamalolo le tumau ai oi laua mai i le palemene mo le 2 tausaga.
I taualumaga a le faamasinoga i le Aso Gafua, na faailoa ai e le loia o loo tulai mo le itu tagi o Dr. Rodney Harrison o le a tuuina atu aloaia i le faamasinoga i le Aso Faraile o le vaiaso nei le talosaga a le itu tagi ma ona teuteuga.
Na taua foi le tatau ona vave maua o se faaiuga i lenei mataupu ona e le o iai lava se leo o ia itumalo e lua i totonu o faigaupufai a le atunuu, e oo mai i le aso.
Na talosaga le loia o loo tulai mo le fofoga fetalai o Taulapapa Brenda Heather Latu e tuu atu se 4 vaiaso e tuu mai ai la latou tali i le talosaga ma ia tuuina atu faamatalaga tauto uma ina ia mafai ai ona tali mai i teuteuga o le talosaga a le itu tagi. Na talia e le faamasino o Tafaoimalo Leilani Warren le talosaga a itu e lua ma ua atofa ai le aso 31 o Mati e toe valaau ai le mataupu i luma o le faamasino sili.
