Ua lē ausia i le taunuuga o le faigapalota a le teritori o Amerika Samoa sa faagasolo i le Aso Lua o le vaiaso nei, le filifiliga o se tofi Kovana ma le Lutena Kovana mo le isi paea’iga fou e 4 tausaga.

Ua mafua lea tulaga ona ua lē maua e paga ta’ito’alua a sui sa tauva mo ia tofiga le 50 pasene o le aofa’iga o palota e tatau ona maua ai le manumalo.

O i la’ua sa umia ia tofiga le Kovana o Lemanu Peleti Mauga ma le Lutena Kovana o Laapui Talauega Eleasalo Ale sa tulaga lua i le aofaiga o palota an o la maua e 3,660 poo le 36 tesimale 2 pasene.

O sui tauva o Pulaalii Nikolao Pula ma Pulu Ae Ae Jr na tulaga muamua i palota na o la maua e 4,284 poo le 42 tesimale 4 pasene, ae tulaga tolu sui tauva o Vaitautolu Talia I’aulualo ma Maefau Dr Mary Taufetee e 2,169 palota na o la maua poo le 21 tesimale 4 pasene.

E 10,113 le aofaiga atoa o palota na faia i le filifiliga o se Kovana ma se Lutena Kovana.

O le lē ausia la o pasene e mana’omia e aloa’ia ai ni sui e manumalo e tauaveina ia tofiga maualuluga e ta’ita’ia le faigamalo a Tutuila ma Manu’a, ua atofa ai le aso 19 o le masina nei o Novema e toe faia ai le palota lea o le a na o sui tauva na tulaga muamua ma tulaga lua palota na o latou maua e faia iai lea filifiliga.

O ia sui, o le Kovana o Lemanu Peleti Mauga ma le Lutena Kovana o Laapui Talauega Eleasalo Ale, ma le paga a Pulaalii Nikolao Pula ma Pulu Ae Ae Jr.

O le faiga filifiliga foi a Amerika Samoa na toe filifilia ai le afioga i le faletua o Aumua Amata mo le isi lua tausaga i le tofi faipule o Amerika Samoa i le Konekeresi i Uosigitone.

O le palota foi lea i le Aso Lua na toe sa’ilia ai ni tofi faipule o le maota o sui poo le fono faitulafono a Tutuila ma Manu’a.