Ua savali le fitu masina o loo nofo taofia pea i le vaaiga a leoleo le tama talavou o Edward Brian Jireh Fanueli, i moliaga o le fasioti tatata faamoemoeina ma isi moliaga e fā ua ia teena, e fesootai lea i le maliu o se tamaitai leoleo ia Tesema o le tausaga na tea nei.
O le masina o Fepuari na aumai ai le faaiuga o lana talosaga e tatala i tua i ni aiaiga ua lē talia, ae o le amataga o lenei vaiaso na toe tuuina atu ai le isi ana talosaga e ala i lana loia mo le tatala i tua e faatali ai le suesueina o molimau a leoleo i ona moliaga, lea ua faatulaga o le masina o Mati o le tausaga fou e suesue ai ia molimau.
O le Aso Gafua asau e toe valaau ai lana talosaga mo le suesueina, ae ua faaauau pea ona nofo taofia i le falepuipui i Tanumalala.
I se tasi o tala mai le faamasinoga, o le lauina o se faasalaga o Malele Atofu Paulo ma Lema’i Faioso Sione, ua toe tolopo i le Aso Faraile le aso 11 o le masina fou lenei o Aokuso.
O le Aso Faraile na tea nei sa faatulaga e lau ai le faasalaga peitai e lei avanoa le faamasino ona o se tuatuagia tāua.
Ua faaopoopo ai le isi lua vaiaso mo Malele e saili ai sana loia mai fafo e pei ona ia manao iai.
Peitai ua faailoa iai e le faamasino, pe maua se loia pe leai o le a faaauau ona lau le faasalaga i moliaga ua faamaonia, o le taupulepule e faaoo le maliu i lē sa avea ma Palemia.
