E 25% lafoga faaopoopo lea na tuuina e Trump i luga o oloa o uamea ma le alumini e auina atu i Amerika ma o se tulaga o loo iai popolega i le ono tulai mai ai o se taua tau fefaatauaiga i le va o atunuu tetele o le lalolagi.
O le Iuni a Europa lea ua aafia mo le uluai taimi i lafoga nei talu ona tulai mai Trump i le tofi Peresitene mo le taimi lona lua , ma ua tali ane nei i lea faaiuga a Amerika e ala i le faia foi o se tulaga faapea i oloa a Amerika o loo aveina atu i o latou atunuu.
O le afiafi o le aso ananafi na folafola ai e Kanata sa latou foi faiga pe silia i le 20 piliona e faaalu ai. O se tulaga ua faailoa e Trump o le a toe tali atu foi iai. E tele finagalo faaalia i le gaioiga lea a Trump, fai mai nisi e toe lavea ai lava Amerika i ana faiga ia aemaise o le a ono faaitiitia ai ma avanoa faigaluega i le auaunaga tau alumini aemaise le popolega o nisi o le a amo uma e le atunuu ma tagata faatau le mamafa o ia ituaiga faaiuga auā o le a atili ai ona sii ma le tau o oloa o loo tuuina ai ia lafoga i luga.
Ua faatulaga nei e Kanata le 25 pasene o lafoga i oloa auina atu i lo latou atunuu mai Amerika, oloa foi tau alumini ma uamea, ae le gata i lea o oloa mai amerika e pei o computers, oloa tau taaloga ma uamea.
Puna o Faamatalaga: https://edition.cnn.com/2025/03/12/economy/trump-steel-aluminum-tariffs-hnk-intl/index.html
