O le a toe tulai i le faamasinoga maualuga le susuga Kolani Lam o loo tuli lona faasalaga soloatoa i le solitulafono o le fasioti tagata faamoemoeina, mo le toe suesueina o ona moliaga e lua e aofia ai le faaoolima, ma le taumafai e faalavelave i le sailiga o le amiotonu lea sa faamaonia i le faaiuga a lea faamasinoga i le iuga na fofogaina ia Fepuari o le tausaga e 2020.
O faaiuga a le faamasinoga o talosaga apili na fofogaina i le amataga o lenei vaiaso na talia ai le apili a Kolani i le faamaonia o ona moliaga ia e lua, ae teena lana talosaga na toe apili le faamaonia o le moliaga o le fasioti tagata faamoemoeina.
E lei faamautuina mai se aso e toe suesue ai lona moliaga o le faaoolima ma le faalavelave i le sailia o le amiotonu.
O le faasalaga soloatoa e mafua mai i le gaioiga na maliu ai lona toalua o Justina Sa’u i se faalavelave na tupu i le masina o Ianauri o le tausaga e 2018.
Ae i le suesueina o lana talosaga apili sa tuuina atu ai e ana loia ni mau fou sa toe lu’i ai le lipoti a le fomai faapitoa na suesueina le mafuaaga o le maliu.
E lei talia ia mau fou, ae talia lana lu’i faasaga i le faaiuga a le faamasinoga maualuga na faamaonia ai ona moliaga e lua o le a toe suesueina.
E 14 aso o loo tālia ai le faaiuga tusitusia a le faamasinoga o talosaga apili i le mataupu lenei ona e lei mae’a nisi o tapenaga seia vagana le taunuuga poo le conclusion na faailoa i le Aso Gafua.
E toatolu faamasino mai Niu Sila ma le faamasinoga e toatasi o le faamasinoga sili a Samoa sa seei i le iloiloina o talosaga apili e fa sa faatulaga mo galuega faaiu a le faamasinoga o talosaga a le faamasinoga maualuga mo lenei tausaga.
O Aperila o le tausaga fou e toe tauaofia ai lenei faamasinoga lea e faalua ona tauaofia i le tausaga mo ana galuega.
