O le 4 tausaga na faasala ai i le falepuipui i le aso 12 o le masina na te’a nei o Novema le alii o Fialelei Tupa’i Fuiava o Faatoia ina ua faamaonia lona umia o le nakoti o le aisa ma le maruana, o lea ua toe faaopoopo iai le 18 masina o le isi ona faasalaga na lauina i le aso 6 o le masina nei o Tesema i le faamaonia o isi ona moliaga o le umia foi o le aisa.

O le tuutuuga a le faamasinoga a uma ona tuli le 4 tausaga, ona faato’ā tuli lea o le 18 masina.

O Fialelei na maua faatasi ma le tasi o taulealea o Daniel Wilson i le osofa’iga a leoleo i le fale o Fialelei i Faatoia ia Iulai o le tausaga e 2022.

O le osofa’iga lea na maua ai e leoleo le aisa e tusa lona mamafa ma le 3.186 kalama, faapea ni lālā o le laau faasāina o le maruana e tusa le mamafa ma le 1.101 kalama.

O se osofa’iga na maua ai ma ni laau malosi.

O le tasi osofa’iga a leoleo i le faletalimalo o le Mareke Lodge e lē o ta’ua mai poo fea le nuu e iai a o afea na alu ai lea osofa’iga a leoleo, na maua ai foi Fialelei i lea nofoaga o ia umia ai le aisa, ma ni paipa e faaaogā mo lea ituaiga o nakoti.

O le mamafa o le aisa na maua i le faletalimalo e 1.17 kalama.

O Iuni o le tausaga e 2030 e faato’ā mae’a tuli ai faasalaga faafalepuipui e lua o lea taulealea, ua 38 tausaga o lona soifua, ua fai le to’alua ma e to’atolu ona alo.