Ua faamaonia mai e le Geoscience Australia e iai se isi foi mafui’e na toe lūlū i Vanuatu i le taeao analeila i le te’a o le 5 i le vaveao i Vanuatu lava ma ua faamauina e 6 lona malosi i le fua mafui’e.
Ua faamaonia mai e le matagaluega o le va i fafo a Ausetalia o loo silafia e iai tagata Ausetalia o loo iai i nofoaga ua aafia i le uluai mafui’e na lūlū i le aso ananafi.
E to’a 14 le aumaliliu ua faamaonia mai e le 9News mai se lipoti a le Red Cross ma le tele o mea ua faaleagaina e oo i ala o fesoota’iga.
Ua ave atu nei le fesoasoani mai Ausetalia ma le ‘au o tagata fesoasoani mo le lavea’iina o soifua.
Na faalēaogāina lapata’iga o se tsunami i le Pasefika i le aso ananafi ina ua mae’a le lūlūuga malosi e 7.3 le malosi i le fua mafui’e i le laumua o Port Vila.
E silia ma le 200 le aumanunu’a a o talitali ai aafiaga o le isi lūlūuga lona lua lea e pei ona lipotia mai i le asō.
Ua fautuaina tagata e aga’i ese mai gataifale o le atunuu faapea ma nofoaga na aafia i le mafui’e.
Puna o Faamatalaga: https://www.9news.com.au/world/vanuatu-earthquake-magnitude-73-earthquake-causes-widespread-damage-in-pacific-island-nation-of-vanuatu/286d9d6e-4b9f-4ecf-a1cd-57284e47eddf
