Ua toe amata i le vaiaso nei tiute o le Ta’ita’ifono o le Komiti Faatonu o le Faalapotopotoga o le Faaputuga Tupe o le Lumanai Manuia o Tagata a Samoa, lea o loo lausilafia e le atunuu i mataitusi o le N.P.F. ina ua mae’a mautu se faaiuga e ala i se finagalo autasi o le Kapeneta.
O le susuga Papalii Panoa Tavita Moala sa faasee tuagalu mo se taimi lē tumau, a o faia se sailiiliga a se komiti o mataupu maa’ale’ale faalotoifale a le pulega o lea faalapotopotoga tuma’oti a le Malo, i ni tuua’iga mai le toafitu o ofisa sinia o le pulega o le NPF sa faatūtu i le ta’ita’ifono.
Ua mae’a lea suesuega ma ua lē faamaonia ia tuua’iga, ma ua faia ai ma le faaiuga a le Kapeneta e toe taliu atu le ta’ita’ifono e faaauau ona tiute.
O le Aso Faraile na te’a nei e pei ona lipotia e le nusipepa o le Samoa Observer na feiloai ai le susuga Papalii Panoa Tavita Moala ma le ta’ita’i o le Malo e faailoa iai le faaiuga a le Kapeneta.
