E le’i soo le motu tele i Salafai i le solo a le vaega faaupufai e Puipuia Aia Tatau o tagata le HRPP lea na faia i le taeao nei ina ua poloka e le tele o afioaga auala a le malo faaoga ai ni maa tetele ae le gata i lea na fesiligia ai le saogalemu o le toataele ona o ni laau malaosi na faapapa i le afio’aga o Salelologa.

O foliga vaaia lea o le malosi o le lagolago a Salafai i le vaega faaupufai a le FAST lea e le gata ua poloka auala ae na faatali mai foi e nisi o afio’aga le oo atu o lea solo pe tua ma ni a.

O le taumafai lava ina ia saogalemu le toatele o se taimi i le taeao na malaga atu ai le vaa a leoleo o le Nafanua i Salafai mulimuli ane alu le faigamalaga a le Talofa Airways e molimoli ai nisi o malu o le malo taitaia atu e le Komesina o Leoleo Fuiavailiili Egon Keil. O le manatu maualuga ia to’a pea le tai ma ia saogalemu tagata uma.

O nisi o afioga e pei o Sasina e le’i alo a latou faamatalaga na faia faasaga i le taitai o le HRPP ma le vaega faaupufai ma faapea ai “Na matou faatali atu lava Tuilaepa poo le a le tulaga e iai le tatou feiloaiga pe tatou feiloai i le itu faatupu pe leai”.

Ua toe foi le vaega faaupufai a le HRPP i tumuā ma ua faalia foi i luga o upega tafailagi faalogona o le toatele o tagata i le tulaga ua tulai mai. O lea ua taunuu manatu a matai a Salelologa e tapu ai fanua ma eleele o le afio’aga ona solia e le solo a taavale a le HRPP.

E ui e lei taunuu fuafuaga a le HRPP e ala i le solo taamilo i Savaii ae na maua le avanoa e tuuina atu ai e le taitai o le HRPP ni fugalaau i le nofoaga o loo lagomau ai lē sa avea ma Palemia o Samoa i le 1982 i le 1985, toe tulai mai i le 1988 seia oo ina faamavae i le 1998 le afioga ia Tofilau Eti Alesana.

Na iai foi le faamoemoe e tuu atu ni teu fugalaau i le nofoaga o le isi tamalii sa avea foi ma Palemia o Samoa i le 1982, toe tulai mai i le 1985 seia oo i le 1988 le afioga ia Vaai Kolone peitai na tali le alo o Vaai ia Papu Solia Vaai e tetee na te le taliaina le oo atu o Tuilaepa e tuu atu fugalaau i le nofoaga o lona tamā. O nei tamalii e to’alua o sui faavae lea o le vaega faaupufai a le HRPP.

O le ala o le tetee a Papu na ia taua “O nei mafuaaga e ala ai ona o’u teena nei faaaloaloga aua foi o le autu a le taamilosaga lea e sau a le HRPP o le faasilasilaga lea ua talepe poo ua faaleagaina e le Faamasino Sili ma le vaega o faamasinoga, alii ma tamaitai faamasino le faavae o Samoa. E le ioe ai lo’u manatu i lea tulaga e le’i faamalepea”.

Na ia taua foi “ua tatau na sui le igoa lea HRPP i le MHRDP Malielegaoi Human Rights Demolition Party. Na maitauina le toe foi le solo a le HRPP i Upolu ae tumau le saogalemu o le motu tele i Salafai.