Ua faamaonia mai nei le faamavae ai o le sui filifilia o le itumalo o Safata No. 2 o le sui foi a le vaega faaupufai e Puipuia Aiā Tatau o tagata ( HRPP) le afioga ia Nonu Teo Lomialagi Lose Niumata mai lona tofi faipule ae o le a toe foi e fai le faigapalota laititi.
O se maliega na autasi uma ai le sui filifilia ma le sui na tagi Laumatiamanu Mathew Ringo Purcell o le sui o le Faatuatua i le Atua Samoa ua Tasi (FAST) ina ia faaui uma i tua la tagi na faia faasaga i le tasi ae le gata i lea faamavae Nonu Lose mai lona tofi faipule ae toe agai e fai le faigapalota laititi ma toe fesiligia ai se finagalo o le itumalo.
Taua e le sui o le FAST Laumatia i fafo o le potu faamasino “ e viia le alii ma e lagona le agaga fiafia ona ua autasi i se maliega ae toe foi e fai le faigapalota ma saili ai pe toe maua ai se avanoa.”
O le iuga o le faigapalota tele i le Aso 9 o Aperila na manumalo ai Nonu Lose Niumata i palota e 578 ae tulai mai Laumatiamanu i palota e 466.
