Ua fautuaina e le komiti a le Palemene na iloiloina le lipoti ma fautuaga a le komisi suesue o faigāpalota le tuuina atu o le mataupu i le palota mai fafo o o tatou tagatanuu ua faamautu i Niu Sila, Ausetalia, Amerika ma isi atunuu i le Pulega Faatonu e silasila iai ma faia se faaiuga ona o se mataupu e lē faigofie.
O le Pulega Faatonu ua aofia ai le Palemia ma le Kapeneta.
O se tasi lea o mataupu sa avea ma se tasi o anava sa finau ai le vaega faaupufai o le Faatuatua i le Atua Samoa ua Tasi i le palota tele ua mae’a.
I le lipoti a le komiti faapalemene na iloiloina le taunuuga o suesuega a le komisi o faigāpalota ua latou teena ai le tele o fautuaga ae apo fautuaga e 12 e pei o le toe foi i itumalo faaleaganuu poo itumalo faaalalafaga sa vaevae ai nuu ma afioaga i tulaga faaleaganuu lea sa faaaogā i le palota tele o le 1991 e oo i le palota tele o le tausaga e 2016.
O lona uiga o afioaga o Salamumu ma Saleaula o le a toe aofia i le itumalo faaalalafaga o Gagaemauga numera 2, ae o Leauvaa o le a toe aofia i totonu o le itumalo o Gagaemauga Numera Tasi.
Le taitaifono o le Komiti Faapalemene mo tulafono tumau, mataupu tau faigāpalota, talosaga ma tofiga faalefaavae, le Sui fofoga fetalai le tofa Auapaau Mulipola Aloitafua.
