Ua toe foi ane le alii o Chanel Harris Tavita i le NZ Warriors ma ua faailoa le fiafia o le alii taalo i se faatalanoaga ma le autusitala.

E tasi le tausaga na agai ese ai Tavita mai le taaloga i le mae’a o le taamilosaga o le 2022.

Ta’ua i lipoti a le Newshub sa maumauai le finau a le alii taalo i sina taimi lea e tasi le tausaga e agai ese ai ma le taaloga ma o le tele o lona taimi i le tausaga nei 2023 sa iai i le faatoaga a lo latou aiga i Samoa.

Fai mai Tavita ua fiafia lava ua toe foi nei i le ‘au ma ua amata foi toleniga e sauniuni ai mo le tausaga fou ma ua aogā foi le taimi sa agai ese ai e toe vaavaai ai i avanoa o loo maua o se tama taalo.

E ui e masani ona vaaia i le tulaga o le ‘afa peitai ua ta’ua i le lipoti sa taalo foi muamua Tavita i le fulupeki i le Warriors ae taalo foi i le tulaga o le hooker mo Samoa i test sa faia.

Fai mai le alii taalo e pule lava le faiaoga.