Ua oo atu nei i le to’a 20 le aofai o tagata i le atunuu ua aafia i auga o le Koviti19 e pei ona fautuaina ai e le Matagaluega o le Soifua Maloloina le Kapeneta i le aoauli nei o le to’a lima ua aafia o le aufaigaluega o loo mataituina i latou e to’a 15 na maua muamua talu mai le Aso Toanai na te’a nei. 

I le faasalalauga a le tamaitai Palemia Fiame Naomi Mataafa i le itula e 6 o le afiafi nei na ia taua ai “O loo faaauau pea ona fai suesuega iai latou uma o loo faanofoesea e aofia ai ma le 208 o a tatou aufaigaluega sa galulue i le aso na taunuu mai ai le vaalele mai Ausetalia”.

Ua faaauau ai le tapunia o Samoa poo le lockdown mo le isi 72 itula mai le 6 o le afiafi nei seia oo i le itula e 6 i le afiafi o le Aso Tofi 27 o Ianuari 2022.

Peitai ua iai nisi o vaega ua tatala e pei o faleoloa, o maketi, fale tupe ma money transfer, o fale talavai ma fale faatau ai cashpower mo le atunuu e afua atu ona tatala i le itula e 8 i le taeao seia oo i le 2pm o le Aso Lua 25 o Ianuari ma le Aso Tofi 27 o Ianuari o le vaiaso nei. 

Ua faia lenei faaiuga ina ia maua ai avanoa mo faatauga a le atunuu mo meataumafama vaega moomia mo aso o le a faaauau ai le tapunia o le atunuu.

Taua e le Palemia o se taimi a taeao e tatau ona maua ai iuga o nei suega o loo faagasolo pea mo i latou o loo faanofoesea i nofoaga faapitoa.