O le ta o le itula e 10 i le po anapo na faasilasila mai ai e le upega tafa’ilagi a le Faalapotopotoga a le malosi faaeletise le toe faaleleia atoa o le eletise i le motu tele i Salafai.
Mo le silafia, o le po o le Aso Lua o le vaiaso na te’a nei, na motusia ai le eletise i le motu tele i Salafai, ma na tele le faaseā a le mamalu o le atunuu o loo alaala ma pāpāaao i Savaii na agiga i luga o upega tafa’ilagi i le lē fiafia i le motusia o le eletise.
O le popolega o le mamalu o le atunuu o le faaleagaina o meatotino e pei o pusa’aisa, televise, ma le tele o mea aogā e faaaogā ai le eletise.
I se tasi o faasilasilaga a le faalapotopotoga o eletise na faailoa mai ai, o le faaletonu o le afi o loo i Salelologa na afua ai ona motusia le eletise, ma na auina atu ai le isi afi sa i le faleafi i Fuluasou e faaola ai le eletise.
Ae i le faatalanoaga a le Minisita o le faalapotopotoga o Olo Fiti Vaai ma le TV1 na ia faailoa ai o le faafitauli na tulai mai i le afi fou ina ua masalomia le pau iai o se uamea i le afi ma o i na faaleagaina ai le afi fou.
Na faamālūlū ai le minisita i le mamalu o le atunuu ona o le faaletonu, ma ia faaalia ai o le a galulue le faalapotopotoga i le toe faaleleia o lea afi fou.
