I le tele o tausaga o galue le susuga Tamaleta Taimang Jensen i ona tomai faatausi tusi, ma ona poto aoaoina i le atina’e o le tamaoaiga poo economics i faletupe i le atunuu, aemaise sa avea ma faiaoga mo ia tomai aoaoina i le Iunivesite Aoao o Samoa.
O se faatalatalanoaga ma lea tamalii ua filifilia e avea ma taitaifono o le Komiti Faatonu o le Faletupe o Atina’e o Samoa, na ia faailoa ai ua silasila e toe faafoi lea faletupe o le atunuu e atiina a’e le siitia o le lelei o faatoaga ma faigafaiva faapea lafumanu.
Sa fesiligia Tamaleta i sona finagalo i le filifilia e avea ma taitaifono o lea faletupe o se meatotino a le Malo, ma tulaga faaletonu o loo feagai ma le faletupe o atina’e ona o nonogatupe tetele a nisi o atina’e tau faletalimalo, ua faigata ona toe faaola seleni na latou nonoina pe aitalafu.
O se tasi o aitalafu a se tasi o faletalimalo o loo iai le faamalumaluga a le Malo e 50 miliona tala.
Se faatalanoaga ma le susuga Tamaleta Taimang Jensen o le taitaifono filifilia o le Komiti Faatonu o le Faletupe o Atina’e o Samoa.
O le taimi nei o loo galue o se faiaoga i mataupu faatausi tusi ma le atina’e o le tamaoaiga i le Kolisi o Maluafou o se tasi o kolisi maualuga a le Ekalesia Faapotopotoga Kerisiano Samoa.
