O le fā masina o lumana’i nei o le a feagai ai le komiti o le tuto’atasi ua filifilia ma tapenaga o le Sisigafu’a i le masina o Iuni o le a toe faafoi ai polokalame i aso e 3 sa masani ai, ma le tele o faafiafiaga ma tauvaga eseese.
O ia polokalame e pei ona faailoa e le Palemia i le fono ma tusitala i le Aso Faraile ua mavae, o savali faaaloalo a a’oga ma faalapotopotoga o le a toe amata savavali atu ai i le eleelefou e aga’i i Mulinuu.
O faafiafiaga o siva ma pese faaleaganuu, o tauvaga faa’ilipu, faleaitu, ma tauvaga o taaloga eseese aemaise le kilikiti faasamoa.
O le a toe faaolaola ai foi tuugavaa alo, o paopao, tulula ma fautasi, ma e lē o iloa pe toe faaoso ai ma tuugavaa apa sa faatino i Sisigafu’a o tausaga ua mavae.
Faaalia e le ta’ita’i o le malo, o le agaga o le faigāmalo filifilia ia toe faatāua sa’iliga malo a Samoa ma ē na lotolotoi ai aemaise o i latou na āsaina le gasū o le taeao i le fia maua o se malo tuto’atasi o Samoa.
