Ua mae’a aumai le faasalaga a le faamasinoga faaitumalo i le mataupu a le alii o Pueleo Sefululua Peseta i moliaga o le faaulufale mai o oloa e lē faatagaina i totonu o Samoa.
Ma o le faasalaga e faamaonia le moliaga ma sala tupe i le $3,000.
O se faasalaga ua manatu le Ofisa o le Loia Sili ua lape ai le silasila a lana afioga i le faamasino o Loau Donald Kerslake, ma ua faaulu ai le talosaga toe iloilo a le Ofisa o le Loia Sili.
O le isi mafuaaga, ua lape le silasila a le faamasino i le lē mamafa o lana silasila i le aofai o fualaau faasāina na maua lea e silia ma le 900 kalama le mamafa.
E lē gata i lea ae ua manatu le Ofisa o le Loia Sili, ua laaloa le silasila a le faamasino i le tumau pea o le tetee o le alii o Peseta e leai sona iloa o ni fualaau faasāina o loo aumai i le faamomoli.
Ma ua talosaga ai le Ofisa o le Loia Sili ina ia faalēaogāina le faasalaga na tuuina mai e le faamasino ia Kerslake e faatatau i lea mataupu.
O le finauga a le Ofisa o le Loia Sili e tatau ona nofosala i le falepuipui le alii o Peseta mo le umi e amata mai i le 6 tausaga ona o le matuiā o le mataupu.
E lua vaiaso ua tuuina atu e le Faamasinoga Faaitumalo i le loia a Peseta e tuuina atu ai se tali i le talosaga ua i lumāmea nei o le Faamasinoga Maualuga.
