E silia ma le 3,800 faia’oga, o ta’ita’i, o i latou e mau faailoga mai faasinomaga eseese, o tagatānuu mai itu e fia o le lalolagi o le a omai faatasi mo se fonotaga tele e faia mai iinei i Aukilani.
O lenei fonotaga ua faaigoaina o le World Indigenous People’s Conference on Education, ma o le taimi muamua lea i le 20 tausaga ua toe talimalo ai Aotearoa i lenei fonotaga.
E 5 aso o le a faatautaia ai lenei fonotaga, e pei ona talimalo ai le Te Wānanga Aronui o Tāmaki Makaurau (AUT) ma Ngāti Whātua Ōrākei.
Ma e faatautaia lea i le Aotea Centre mai le aso 16–20 Novema.
Ua faamauina o le a amata lea faamoemoe i se pōwhiri poo se tu ma se aga i fanua a Maori, ma se Parade of Nations e aofia le silia ma le 20 o aganuu eseese.
Faaalia e ta’ita’ifono o lenei faatasiga o le a vaaia ai le patipatia o tu ma aga faaleaganuu a atunuu o le a auai, o le gagana, aemaise o le faasoa ai o le lumana’i o a’oa’oga faaleaganuu.
O le a iai foi ni faafiafiaga ma faatasiga i Te Ao Pūtahi, ma o le a molimauina ai e le usugafono faafiafiaga faa-Maori, kapa haka, musika ma le tele o polokalame faataatitia mo lea fonotaga.
