Tusia : Maina Misa Foma’i-Vai
Ua faailoa mai e le Afioga i le Kovana o Amerika Samoa Lemanu PS Mauga i se faasalalauga tuusa’o i luga o le ala ata o le KVZKTV le maliu ai o se tamā ona o le faama’i o le Koviti.
O le tamā ua maliu e 44 tausaga le matua mai le Itumalo o Leasina i le afioaga o Asu. Na faailoa e se tasi o paaga a le Radio Samoa o alala ai i Amerika Samoa, o si tamā ua maliu ua maea uma ona tui e tolu. O loo faaalia foi e le Kovana e iai gasegase tumau o le ua maliu nei.
I le faasalalauga tuusa’o a le KVZKTV o loo tuuina mai ai faamaisega ma faamafanafanaga a le Alii Kovana, o le Kovana Lutena ma le Failautusi i aiga faavauvau aemaise o le atunuu. Sa faailoa foi le tulaga o loo ta’imua ai galuega a le Malo ina ia aua nei o’o mai tulaga faigata ia i Amerika Samoa peitai e le o mafai lava ona ‘alofia.
O loo faamalosi mai foi le Alii Kovana ina ia usitaia fuafuaga ua faataatia e le Malo e ala i le Soifua Maloloina mo le atunuu atoa e aveesea ai tulaga ogaoga ma oo atu ai i maumau ai o le soifua.
