E toaono talavou e aofia ai ma se tamatiti 11 tausaga ua pue e leoleo ina ua soso’a atu e le taavale gaoia na o atu ai se laina o taavale i se fetaulaiga ala i Aukilani.
O le faamatalaga mai le ofisa o leoleo i Aukilani Tutotonu ua ta’ua ai na tali atu leoleo i le faalavelave lea i Great North ma Ponsonby Rd poo le toe kuata i le 7 i le afiafi ananafi, na vaaia ai se taavale o saosaoa atu i le fetaulaiga ala, ua lē mafai ai e le avetaavale ona taofiofi le taavale ma soso’a atu ai ma isi taavale sa faatali i moli.
Na sosola ese le aualii ia agai i Kroad ae maua e leoleo i se taimi mulimuli ane ma ave ai mo suesuega.
Na faavave atu le fesoasoani faavavave mo le atunuu lautele na iai i lea nofoaga ae leai se tasi na afaina.
Fai mai leoleo o le itu lea e faafetai ai e leai se soifua o aafia ae o loo faaauau pea suesuega.
