Ua iai tagata ua pu’e e leoleo e faatatau i le fasiotia o si tamā matua mai Sini lea na ave faamalosia mai lona fale i le silia ma le 10 aso talu ai.
O le matāupu lea o loo ta’ua e le BBC na ave faamalosia mai ai le tamā e 85 tausaga o le soifua, o Chris Baghsarian mai lona fale i North Ryde i le aso 13 o le masina nei, ma e talitonu leoleo e lē o le tagata lea na ‘auga mai iai le osofa’iga ae o se aiga e i le faaitu lea e iai sootaga i kegi solitulafono.
O le amataga mai o lenei vaiaso ua maua ai faamaoniga mai leoleo o le tamā matua lea na maua ua maliu, na maua lona tino e lata i se malae tapolo e latalata i le aai i Sini.
O le to’alua la ua pu’eina i le asō o alii uma e 24 ma le 29 tausaga le matutua ma e le’i faia ni moliaga i le taimi nei ae o loo faia su’esu’ega.
O loo talosaga foi leoleo i nisi e ono silafia ni faamatalaga i lenei faalavelave ina ia fesoota’i vave ane ma ua lē faato’ā tupu ai lea o se tulaga faapea o le sesē o i latou e aafia i ni osofa’iga poo ni faufauga faapea.
O le tausaga foi na te’a nei na fanaina ai se alii talavou e 23 tausaga le matua, o se palama i le driveway o se fale i Condell Park, fai mai leoleo e talitonu e sesē foi le tagata na aga’i atu iai le osofa’iga ae ua ma’umau ai fua le soifua o sia alii talavou.
Puna o Faamatalaga: https://www.bbc.com/news/articles/cx2d7zyd41go
