E toalua tagata ua maliliu ma le isi o loo tigaina i le falemai mai se faalavelave tau taavale ua lipotia mai foi i le North Coast o Niu Sa Uelese.

Fai mai na faavave ane le fesoasoani faavavave i le Pacific Highway pe ā ma le 25 kilomita mai Coffs Harbour i le te’a o le 12 i le vaveao analeila ona o lipoti o se taavale ua lavea.

Ta’ua e molimau o le taavale na feto’ai ma se laau i Bonville ma mu ai le taavale ma o loo tapunia ai lava se tasi lea o highway tele.

O se faamatalaga a leoleo ua ta’ua ai o le avetaavale o se tamaitai ma le pasese o se alii pe ā ma le tai 20 tausaga le matutua, na maliliu e lei taunuu atu paramedics.

O le isi e atoa iai le toatolu na faimalaga atu i le taavale, o se alii foi na mafai ona agai ese ma le taavale, e 20 foi tausaga o lea alii ma sa faavave atu i le falemai i se tulaga tigaina.

O loo faia suesuega i lenei faalavelave ae lei faamautuina aloaia foi i laua ua maliliu se’i mae’a le galuega a le ausuesue.

Puna o Faamatalaga: https://www.9news.com.au/national/pacific-highway-coffs-harbour-fiery-crash-claims-young-lives/2319c1bb-7cdc-456c-bafc-370f503c8f27