E oo mai lava i le taimi nei o loo lapataia pea tagata ia alofia le latalata ane i le nofoaga o iai fale tetele e lua na faatama’ia e le afi i le afiafi ananafi i le ogatotonugalemu o Sini.

O le popolega o leoleo mo le saogalemu ona nei pa’ūū ane vaega o fale ia ua faaleagaina i le afi ma aafia ai ni soifua.

E lei mafai lava ona ulufale le ausuesue i nofoaga ua faatama’ia mo le sailia o le mafuaaga ae pe na iai foi se tasi poo nisi na iai i totonu. 

E tele le mau lipoti ua alia’e nei mai lea faalavelave ma faamatala ai e le toatele sa iai i le nofoaga lea i le aso ananafi le tulaga fefe ma le popole ina ua sasao ane le afi.

O se tasi molimau na ia faamatala i le 9News sa fetaui i le taimi lea ma tamaiti o loo feei ma tamomoe ese mai le fale ma tauvalaau i se isi tagata o loo i totonu pea o le fale ina ia agai ese mai i fafo.

E le o iai se isi ua faamaonia mai ua maliu i le afi lea ae se’i vagana ua ulufale fuimu e faia le latou suesuega i le vaega na sasao ai le afi. 

O se tasi lenei o afi tele ua sasao ane i Sini ma oo ai i se tulaga lamatia soifua o tagata e aumau i fale e lalata ane.

O loo ta’ua o le fale ua aafia o se nofoaga sa iai se fale fai pulou, hat factory ma e latalata tele i le Central Station.

Fai mai leoleo o le itu e faafetaia ai ona e lei iai se soifua o le au tineimu na aafia aemaise le ogaoga tele o le faalavelave.

E silia ma le 100 le vaega a le tineimu na galulue ai i le faalavelave lea mai vaega eseese o Sini.

O se lipoti lata mai o lenei mataupu ua faailoa ai e toalua ni talavou laiti tai 13 tausaga o loo fesoasoani nei i leoleo i le suesuega o le mataupu lea.

Fai mai isi lipoti e toalua ni talavou laiti na agai ane i leoleo i le taeao analeila ma le faamatalaga o laua e tuuaia i le afi.