E to’alua nisi na taofia mai e leoleo na maua i se taavale na fealua’i saoasaoa e lē kiina molī, i auala i Papakura i le po anapo.
O le tusa o le 12.30 i le vaveao anapo na maitauina ai e se taavale a leoleo se taavale o loo alu atu saoasaoa ae lē o kiina moli o le taavale; ma pasia se taavale a leoleo i le auala i Great South Road.
Ta’ua e Counties Manukau South Area Prevention Manager, Inspector Matt Hoyes, e le’i taumafai leoleo e tuliloa le taavale gaoi lenei, ae tuu loa i le fesoasoani a le helikopa a leoleo, le Police Eagle.
Na mafai e le Eagle ona mulimuli ai lava e tulimata’i le faaitu na aga’i iai lenei taavale; ma maua ai le vaega na masau solo iai le alu atu a lenei taavale.
Na afe i tua i Glenburn Place, na feosofi i fafo i la’ua na oatu ai, ma tamomo’e ese ae tia’i le taavale o loo alu pea, se’ia oo ina alu atu ma so’a se pa.
Fai mai Inspector Hoyes sa taumafai le to’alua lea e lafi lafi solo atu i vaifale o tuaoi e tau sosola ese ai, ae le’i manuia le la taumafaiga, auā sa manino lelei le iloa mai luga i le helikopa, ma logo mai loa lalo i le fogaeleele i leoleo e faasino tonu iai le nofoaga sa lalafi ai.
O lea la ua i lima nei o leoleo i la’ua nei, o ni talavou se to’alua e ta’i 14 tausaga le matutua, ma ua faasee atu i le vaega e nafa ma matāupu o tupulaga talavou, le Youth Aid Services.
O le fautuaga mai leoleo, soo se taimi e te vaaia ai soo se taavale o loo alu i luga o le auala i se tulaga mata’utia e ono lamatia ai ni soifua, ia vave ona faafesootai Leoleo i le 111 i le taimi lava lena, poo le numera 105 pe afai e te lipotia se mea ua uma ona tupu.
Puna o Faamatalaga: Counties Manukau Police
