O se tala fiafia mo nisi alo taaalo a le Manu Samoa e toalua, o se avanoa e taaalo ai mo le kalapu a le Moana Pasifika.  

O Melani Matavao ma le taulealea ia Tuna Tuitama ua saini atu nei e taaalo i le ‘au a le Moana Pasifika mo le tausaga 2025 agai i le tausaga 2026.

O se tala fiafia lea e tusa ai ma se pepa o faamatalaga a le Moana Pasifika, e faapea o nei alii e toalua o nisi ua mata’ina a la taumafaiga ma ua telē foi lo la sao i le taaloga mo Samoa ma o ni tagata taaalo ua vaaia le maoa’e o le faaaogāina o a la taleni, ma avea ma ni faata’ita’iga lelei mo alo ma fanau o le atunuu mo le taaloga o le lakapi.  

Ua faaalia i lea pepa o faamatalaga le agaga faafetai o le alii o Melani Matavao, ona o le mafai ona ia toe ofi atu i le kalapu, ma o se mitamitaga ia te ia o le mafai ona faaauau lona taalo mo le kalapu ona o se auala lea e na te tauaveina ai lona aiga, o le atunuu ae faapena foi le Pasefika.

Ae mo le alii o Tuna Tuitama, na ia ta’ua, “O le Moana Pasifika, o se ‘au e faatāua le aganuu, o se isi itu lena ua ou fia auai ai i le malaga a le Moana Pasifika. O a’u o le tama Samoa, ma e teu i lo’u loto lo’u atunuu ma lo’u faasinomaga” 

O le lona lua ai lea o taimi ua saini ai Melani Matavao i le kalapu, ae o le uluai taimi lenei mo le alii o Tuna Tuitama e auai atu ai mo le aulakapi a le Moana Pasifika.