O le masina lenei o Mati o le a amata ai su’esu’ega i le maliu o le taulealea talavou o Tuu’au Faasavalu lea o le a faatino e leoleo e to’alima mai Niu Sila.
O le isi lea o laasaga o le a sosoo ai i le mae’a ona aumai le faai’uga a le Faamasinoga Faaitumalo lea na fofogaina i le Aso Faraile ua mavae ua faamamā ai tuua’iga sa molia ai le ta’ita’i o le malo i le Palemia.
I se finagalo o le susuga Laaulialemalietoa Leuatea Polataivao Fosi ina ua mae’a ona lau lea faai’uga sa ia faailoa ai le laasaga o le a faatino lea e lē gata e su’esu’e e leoleo mai Niu Sila poo ai na maliu ai le taulealea o Tuu’au lea na aafia i se faalavelave tau taavale i le savalia ai nei o le lima tausaga, ae o le a su’esu’e ai ma se tuua’iga i se faufauga e faaoo le maliu i le faipule o Gagaifomauga 3 ua avea nei ma Palemia.
O se finagalo o le ta’ita’i o le malo susuga Laaulialemalietoa Leuatea Polataivao Fosi i le polokalame o le Fofola le Fala ma le Palemia.
O le faai’uga a le faamasinoga sa fofogaina i le faai’uga o le vaiaso ua mavae lea sa auai le sui o le Radio Samoa sa lipotiina taualumaga a o fofogaina molimau se’ia oo ina aumai le faai’uga.
O se talanoaga ma le afioga Lilomaiava Maina Vai o le sui o le Radio Samoa.
