E toafā fomai mata mai atunuu o le Pasefika e aofia ai Vanuatu, Tonga, ma Fiti ua galulue nei ma le fomai o mata o loo vaaia lea auaunaga a le matagaluega o le soifua maloloina, i le faia o se sailiiliga poo se survey i se taumafaiga e saili aafiaga o fofoga poo mata o tagata o le tatou atunuu ina ia mafai ona maua tonu ai se silafia i gasegase ma faaletonu o aafia ai lea totoga tāua o le tagata soifua, ma faia iai ni togafitiga e taofia ai le po o le vaai.

Ua faailoa lea galuega e le matagaluega o le soifua maloloina ina ua mae’a faalauiloa aloaia le polokalame mo le vaaia lelei o mata a o tauaofia i lo tatou atunuu le fono a faauluuluga o auaunaga tau soifua maloloina a atunuu o le Pasefika sa talimalo ai Samoa i le vaiaso ua mavae atu nei.

Ua faaalia e le matagaluega o le lua vaiaso muamua a o lei faia le sailiiliga o le a faatino ai e fomai mata ma tausi soifua ua a’oa’oina mo le vaaia o mata se aoaoga i auala o le a faatino ai lea sailiiliga.

O le tamaitai fomai o Dr Lucilla Ah Ching o loo faauluulu iai le vaega o togafitiga o mata i le matagaluega o le soifua maloloina ae lagolago iai le sooupu mo le vaaia lava o mata o Carol Auvaa.

O i laua ia o loo galulue faatasi ma fomai mata e toafā mai Vanuatu, Fiti ma Tonga.