O se alii Samoa le pailate na faafoeina le malaga a le Jetstar JQ225 lea na tau tulai mai ai se faaletonu i le Aso Faraile talu ai, ina ua faafuasei ona see ese le vaalele mai le runway i le malaevaalele i Kalaiesetete ina ua tulaueleele.
O se tasi o molimau faatuatuaina sa iai i luga o le pasese a le vaalele i lea aso, e lei finagalo e faailoa loa suafa, ae na ia faailoa lona agaga faafetai ona o le to’a o le alii pailate i le tau toe faafoefoeina o le vaa ina ua faafuasei ona tulai mai lea faaletonu, ma mafai ai ona faasaoina uma le pasese faapea le auvaa mai se faalavelave na semanū e tupu.
O le alii pailate Samoa, Captain James Williams lea na ia faafoeina le malaga i lea aso, faatasi ma le pailate lagolago o se alii papalagi, ma na ta’ua e lea molimau, a o lei amata le latou faigamalaga, sa faafeiloai mai le pasese e le alii pailate i lana gagana Samoa, auā o le aso mulimuli foi lea o le faatāuaina o le Vaiaso o le Gagana Samoa.
E pei ona muai lipotia atu i talafou lenei faafitauli, na faamatala ai foi e nisi o le pasese sa i luga o le faigamalaga a le Jetstar lea na see ese mai le runway i Kalaiesetete le tulaga na tupu ina ua tulaueleele le vaa.
Sa iai i lea lava faigamalaga se tasi o tamaitai e tusitusi mo le NZ Herald, Diana Clement, na ia ta’ua, na oo atu loli a le aufuimu ina ua uma lea ona logoina latou le pasese, atonu o se hydraulic leak i le itu taumatau o le vaa lea na mafua ai ona see ese le vaalele mai le runway.
O loo ta’ua i le NZ Herald se saunoaga a le chief operating officer a le Jetstar, Matt Franzi, e faapea o se faaletonu na tulai mai i le vaega e femilosa’i ai le ave o le vaa (steering issue), e sootaga atu i se tasi o hydraulic systems ua faaletonu o le vaa.
O loo faagasolo la suesuega a le TAIC poo le Transport Accident Investigation Commission i lenei faalavelave na tulai mai, ae o le mea mautinoa, e faafetaia ona e lei iai se tasi na afaina ai se’i vagana lagona fememea’i o le pasese i le tulaga faate’ia na iai.
