O se osofaiga a le Matagaluega o leoleo na alu i le Aso Lulu o le vaiaso nei na maua ai ni fualaau faasaina ma nisi o meatotino i se fale o se aiga i Vaigaga.
E toa fa i latou na maua atu ai e leoleo i lea fale ma na toafia uma i latou, e toatolu alii e i le va o le 30 – 35 tausaga le matutua ma le tamaitai e toatasi e i le va o le 18 – 25 tausaga le matua. O alii uma ia e toatolu pei ona taua e leoleo e iai foi solitulafono muamua ua faamauina i faamaumauga a le Matagaluega, o le isi toalua na tuu atu i iai faasalaga faafale puipui muamua peitia o le tasi nao faamaumauga faamaonia ai solitulafono.
E 7 pepaiila o loo iai le aisa pe tusa ma le 2.36 kalama le mamafa, o paipa e ula ai lea fualaau faasaina, o lālā mariuana faapea ma le tele o nisi o ola pe o tekonolosi faaonaponei na maua mai i lea osofaiga e pei o mea pueata, o laptops o telefoni ma le tino i tupe e $4,330.60.
O loo faagasolo nei faatalatalanoaga ma i latou ua toafia ma o le a molia uma i le umia o fualaau faasaina o se taimi o i luma ona faailoa lea o le aso e tulai ai i le faamasinoga.
