O se kulupu o tamaiti talavou e toaono e tai 12 ma le 13 tausaga le matutua ua pueina i le itu i Sasae o Aukilani i le po o le Aso Lulu i le mae’a o lipoti na o latou osofaia ni taavale.
Fai mai na vaaia le kulupu lea poo le toe kuata i le fā i le vaveao i Sunnyhills lea na mulimuli iai le helicopter a leoleo.
Fai mai leoleo e lua taavale na osofaia e le vaega lea, o le isi taavale na taofia i Otara i Ti Rakau Drive ma pueina ai talavou e toalima.
O le isi taavale na fealuai solo i Howick ma Whitford ma taofia ai e leoleo i le alalaupapa i Panmure ma pueina ai le avetaavale.
O i latou uma ia e toaono o le a tuuina atu i le Youth Aid.
Ta’ua e leoleo e faafetaia le fesoasoai a le komiuniti i le lipotia ane o ituaiga soligatulafono faapea i leoleo.
