E tigaina manuaga o nisi o le aufaigaluega a le Burger King i Aukilani i Saute ma e faapea na tatui (tulou).
O le tea o le tolu i le aoauli ananafi e tusa ma lipoti na tupu ai i le Burger King i Great South Road i Takanini ma e faapea na tatui i le nofoaga o iai le fale’aiga.
O tala mai leoleo e toatasi le alii na faia ma na uma loa toe sola ese.
E lei mamao ma le nofoaga na tupu ai le mea na toe maua mulimuli ai ananafi ma o lea na ave e leoleo.
Ae mo le toalua o le aufaigaluega ua faamanualia, o lea na auina atu i le falemai i Middlemore ma i se faamatalaga mai leoleo, e le faigofie le mea ua tupu ma o lea na vave ona tali atu iai sui o le ofisa.
O lē ua ave e leoleo e tusa ma le mataupu lenei e 23 tausaga o lona matua.
