Ua matua’i lē fiafia le malo tele o Amerika e pei ona faailoa i lipoti ina ua pu’eina e Thailand se tasi o tagata Amerika a’oa’oina ma molia i le faatino o ni amioga lē faaaloalo i le aigatupu i Thailand.

O le faamatalaga mai le ofisa o le Malo i Amerika ua faailoa ai o se mataupu e lē taatele lea ituaiga mataupu ma o lē ua aafia o Paul Chambers o se faia’oga i le Naresuan University i le ogatotonu o Thailand, ma o ia na te tusia iloiloga e faatatau i mataupu faamiliteli ma polokiki i lea atunuu.

Ua faailoa i tala a le CNN e ono tele ni tausaga e falepuipui ai lē ua molia pe afai ae faamaonia ona e fai si malosi o tulafono e faatatau i le faauluuluga o le atunuu, o loo feta’ua’ina e ono oo i le 15 tausaga i le falepuipui se faasalaga mo se tasi e faitioina le Tupu ma le Masiofo poo so la suli foi.

Ua faailoa la e le ofisa o Amerika le lē fiafia i le tulaga ua tula’i mai ma ua tuuina atu nei le fesoasoani mo lē ua molia ma fesoota’i atu i le malo o Thailand e uiga i lea mataupu.

Puna o Faamatalaga: https://edition.cnn.com/2025/04/08/asia/thailand-lese-majeste-paul-chambers-intl-hnk/index.html