Ua ave i tua le talosaga a se alii sa avea ma leoleo o le malo sa fuafua ai lana loia e finauina se poloa’iga lē tumau a le faamasinoga e taofia ai le faailoaina lautele o lona suafa e mafua i ni moliaga se lua a leoleo.
O Visesio Anthony Sitanisilao, 41 tausaga o le soifua, o loo molia i moliaga e lua o le forgery e fesoota’i i lona saini faamalosi o le suafa o se alii leoleo sinia i se tusi sa faailoa ai le loto malie o lea tagata na te faamaonia se nonogatupe a lē ua molia.
E faatino lea gaioiga o loo malaga ese ma Samoa lē na faaaogā lona suafa e saini i le tusi.
O faanaumauga a leoleo o loo faailoa ai o le va o le aso muamua ma le aso 30 o Iuni o le tausaga e 2022 na faatino ai lea solitulafono, faapea le masina o Fepuari o le tausaga lava lea.
O le faaui i tua o lea talosaga ua tuuina atu ai ma le tali tetee a Visesio i moliaga ma ua faatulaga ai le masina o Setema o le tausaga nei e valaau ai molimau a leoleo.
