E 18 moliaga uma a leoleo ua faamautū faasaga ia i latou e to’atolu e aofia ai se tamaitai o loo tuua’ia i le faaulufaleina faasolitulafono i Samoa o le nakoti o le ‘aisa e 10 kilokalama lea ua faamauina o le aisa pito mamafa lea ua aumai i lo tatou atunuu.
O lona tau pe a faatau lea pauta faasāina e pei ona lipotia e tusa ma le 4 tesimale 5 miliona tālā Samoa.
O moliaga e 18 a leoleo e lē gata o loo aafia ai le aumai faasolitulafono o le ‘aisa ae faapea foi i le faaulufale mai faasolitulafono ma le suāuu e maua mai i le laau faasāina o le maruana poo le cannabis oil lea o loo faamauina faaletulafono o se ituaiga o laau faasāina o loo i le Class B narcotic.
Ua tuuina atu ai ma tali tetee e loia a i latou e to’atolu o loo molia e leoleo i lenei mataupu tau faamasinoga, e aofia ai le tamā matua 74 tausaga o Roderick Ignatius Mackenzie o Lotopa, Pesega ma le nuu o Iliili i Amerika Samoa, o Peter Hanipale Malae 42 tausaga o Lotopa ma Pesega, ma le tamaitai o Jacinta Selafi Chung Kwan 54 tausaga le matua o le nuu o Saina ma Avao i Savaii.
O loo faaauau ona tatala i tua i latou i aiaiga ua mae’a faataoto e le faamasinoga, ma ua faatulaga ai le masina o Setema o le tausaga nei e valaau ai molimau a leoleo.
