A o nofo taofia pea i le falepuipui i Tanumalala le tamā o Pokati Tu’u poo Pokati Faatau’ī 58 tausaga le matua o Fasitoouta, o le Aso Gafua na tula’i ai i le Faamasinoga Maualuga ma tuuina atu ai e lana loia lana tali tetee i moliaga uma e iva a leoleo.
O Pokati e lua moliaga o le fasioti tagata faamoemoeina o loo tuua’ia ai ma o ia solitulafono na ia faatino na fano ai le soifua o se leoleo satini ma se tama tane o le nuu o Nofoalii.
O isi moliaga o loo ia teena o le umia o se a’upega mata’utia o se laau malosi, moliaga o le faaoolima, moliaga o le umia o se fana e lei laiseneina, umia o ututau ma lona faalālā o le laau malosi i se tagata.
O le isi moliaga o le fasioti tagata pa’ivalea.
O le Aso Gafua a sau e toe tula’i ai Pokati i le faamasinoga mo lana talosaga e tatala i tua i ni aiaiga, ma o le avanoa lea e tali ai loia a leoleo pe latou te talia pe teena lea talosaga.
