O le faaiuga a le World Rugby e faamalolo lē tumau le tama taalo o le Ikale Tahi a Tonga, George Moala mo taaloga e lima, ua faitioina e nisi o tama taaalo iloga o le Pasefika aemaise e lei leva nei ona faaleaogaina e le judicial committee a le Six Nations le faaiuga faapea na faia i le kapeteni a Egelani o Owen Farrell.
O Moala na red card i le taaloga a Tonga ma Kanata i Nukualofa i le aso 10 o le masina nei ma tuuina iai se faasalaga e 10 taaloga e lē taalo ai ae na toe faaitiitia mai i le lima taaloga mulimuli ane.
O lona uiga o le a ia misia uma pool games a le latou ‘au i le amataga o le Ipu o le Lalolagi ia Oketopa.
O nisi la o tama taaalo a le Ikale Tahi faatasi ai ma tama o le Manu Samoa e pei o Lima Sopoaga ma Steven Luatua lea na faailoa lo latou lē fiafia i le faaiuga ma finau ai i luga o upega tafailagi ina ia mafai ona taalo Moala mo uluai taaloga a lana ‘au i le Ipu o le Lalolagi.
