Ua teena e loia a leoleo le talosaga a Vaotu’ua Auleoleo Neemia o loo molia i le fasioti tagata faamoemoeina, o loo finauina ai e lana loia se fesuia’iga i aiaiga o loo tatala ai i tua, ina ia mafai ona ia tuua Samoa i se malaga i fafo ona toe foi mai lea e tali lona moliaga.

Na toe valaau le mataupu lenei i le amataga o lenei vaiaso mo se tali a leoleo i le talosaga ma ua faatulaga ai o le aso 11 o Iulai e iloilo ai mo se faaiuga pe talia pe teena. O lē ua molia ma talosaga i ni suiga o aiaiga o loo tatala ai i tua ona e fia malaga i fafo, o loo molia e mafua i lona umia o se auupega o se laau malosi o le ituaiga o le 22 calibre handgun na ia faaoo ai le maliu i ni alii se to’alua o le nuu o Afega i le po o le vaeluaga o le Tausaga fou 2020. O loo molia foi i lona umia o se laau malosi e lē faatagaina. 

I le faamasinoga sili lava a le atunuu, o lea ua faatulaga le aso 21 o Novema e valaau ai molimau e lagolago ai ni moliaga o se alii leoleo satini sa ia vaaia le ofisa o leoleo i Fagamalo o ia lea o Reupena Oloapu. O loo molia o ia i ni gaioiga solitulafono sa ia taumafai e faatino i se tamaitai leoleo. O loo ia teena moliaga uma. 

I le ma le mataupu o le talosaga a Lema’i Faioso Sione ma Malele Atofu Paulo i le la talosaga e ala mai i le la loia ina ia taofia le faaauauina o su’esu’ega a le faamasinoga i o la moliaga o le taupulepule e tagatavale lē sa avea ma Palemia. O lea ua faatulaga e le faamasinoga e su’esu’eina le talosaga lenei i le aso 22 o le masina fou o Iulai.