O le tolu tausaga ua tuana’i e amata mai i le tausaga e 2022 e oo mai i le tausaga na te’a nei 2024, ua faailoa e le Ofisa Sili o le faalapotopotoga o le malosi tau eletise, o se vaitaimi lea na molimauina ai le siitia maualuga o le tulaga mana’omia o le eletise.
Faaalia e le Ofisa Sili o lea faalapotopotoga a le malo le afioga Faumui Iese Toimoana o le va o le tausaga 2022 ma le 2023 e 10 pasene na siitia ai le tulaga mana’omia o le eletise, ae oo mai i le tausaga na te’a nei 2024 ua 13 pasene.
O loo iai le talitonuga o le televave ma le saoasaoa o le siitia o gaioiga tau atina’e o aiga ma pisinisi o se tasi lea o mafua’aga o le siitia o le mana’omia o le eletise.
O se tulaga ua silasila iai le faalapotopotoga ma faia iai se tapenaga ina ia alofia ai le toe tula’i mai o se faaletonu e motusia ai lana auaunaga tau eletise i le atunuu atoa e pei ona iai le poloa’iga o faalavelave faafuase’i mo le 30 aso, e toe faatulaga lelei ai faaletonu o le eletise i le motu o Upolu.
Le afioga Faumui Iese Toimoana o le Ofisa Sili o pulega o le faalapotopotoga o le malosi tau eletise.
Ua tatala nei le ofisa tutotonu o polokalame ma galuega i taimi o faalavelave matuiā le National Emergency Operations Center poo le NEOC i Tuanaimato mo le faatinoina o matafaioi a le malo mo le toe faaleleia o auaunaga tau eletise, faapea ma fuafuaga mo le faaitiitia o aafiaga i le atunuu e tauala atu i vaega e pei o le
1. Vave faaleleia atoatoa o le auaunaga tau eletise mo le motu o Upolu.
2. Faapafala totogi o tiute ma lafoga mo afi, meafaigaluega e aofia ai ma malosi’aga faafouina o le a faatauina mai fafo mo auaunaga tau eletise.
3. Faamautū polokalame fesoasoani e faamāmā avega ai i aiga, pisinisi ma vaega ma’oti o le atunuu ua aafia ma,
4. Faamautū atina’e fesoasoani (vaega tupe ma tomai faapitoa) mo le faatinoga o fuafuaga alualu mamao a le Faalapotopotoga o Malosiaga tau Eletise.
Ua fautuaina ai le mamalu o le atunuu ina ia faafesoota’i le Ofisa Tutotonu mo Faalavelave matuiā pe afai o iai nisi mataupu o loo fia maua iai se malamalamaaga.
