Ua faatulaga mai i le kalena a le Lakapi Samoa mo taaloga o lenei tausaga le tele o tausinioga faavaomalo o le a auai atu iai ‘au a Samoa auā ua toe saoloto malaga masani, e le pei o le lua tausaga ua mavae sa saisaitia le faia o ni taamilosaga faavaomalo ona o le faamai.
O le ‘au tele a le Manu Samoa e tele ana tapenaga mo le Ipu o le lalolagi i lenei tausaga e pei ona o le a faia i Farani mai le masina o Setema e oo ia Oketopa.
O le isi tapenaga a le ‘au 15 a le Manu Samoa o le Ipu o le Pasefika le NPC lea o loo latou umia mai le tausaga na tea nei. O le taamilosaga lea i le masina o Aokuso o se isi faavevela lelei e tapenapena ai le aulakapi tele a le atunuu i le Ipu o le Lalolagi.
I le kalena o taaloga o lenei tausaga e pei ona faailoa e le pulega o le Lakapi Samoa ua faailoa ai ua le faataunuuina vae lona 6, 7 ma le 8 o le taamilosaga lakapi fitu a le Vodafone sa faatulaga i le masina amata o lenei tausaga, ona o lea ua ave le faamuamua i le taamilosaga a kalapu mai Iuni faaitumalo mo le sauni ai i le sailiga o le siamupini o le NPC i le masina o Mati.
O le a toe faaauau le taamilosaga lakapi taitoafitu a le Vodafone ia Setema pe a mae’a le taamilosaga o le vaiaso o le Teuila o lenei tausaga fou.
O le aulakapi a tamaitai le Manu Sina e iai ana taaloga i le masina o Mati e sauniuni ai i le taamilosaga sue siamupini a atunuu o le Oceania e faia i le masina o Me.
O le ‘au a le Manu Samoa laiti ua agavaa nei mo le taamilosaga o le Ipu a le lalolagi i le vaega o le matutua o tama e i lalo o le 20 tausaga le matutua le Under-20.
E lei faamautu se atunuu o le a faia ai lea taamilosaga, ae na sao Samoa i le taamilosaga ina ua faiaina ai le ‘au a Tonga i le taamilosaga a le Oceania na faia i Tonga i le tausaga na tea nei.
