O le aloa’ia ai nei o le tasi o fuafuaga alualu mamao a le malo, e pei ona tatala ai le polokalame o le Faatonu Folau mo le tapu’eina o olaga amata o fanau, ua faaalia e le ta’ita’i o le malo o se taeao fou mo le atunuu auā o se galuega ua faatino e fausia ai le faavae mausalī o le ono tausaga muamua o a tatou fanauiti i le faamoemoe, e manuia ai le lumana’i o aiga, nuu, ekalesia, ma le atunuu.
O le faalauiloaina aloa’ia o lea taumafaiga a le malo ua faailoa ai e le tamaitai Palemia le afioga Fiame Naomi Mataafa, o faamaumauga o iai nei e mana’omia tele ai se galuega mo le faaleleia o auaunaga e fesoota’i i le a’oa’oina ma le vaaia lelei o a tatou fanauiti.
O le tasi o ia faamaumauga o loo faailoa ai o le 126 o A’oga Faata’ita’i i le atunuu e na o le 3 lava A’oga Faata’ita’i poo Preschools ua ausia tulaga maualuga i le a’oa’oina o fanau, ae o le isi itu e ao ona faaleleia o tupe o loo tuuina atu e le malo mo le faaleleia o A’oga Amata e lē atoa se tasi le pasene.
O se tasi lea o vaega e ao i le Matagaluega o Aoga ma Aganuu e pei ona faailoa e le Palemia e tatau ona silasila iai a o faasafua pe tufatufa atu i a’oga uma i le atunuu le fesoasoani a le malo e 18 miliona tala, lea na amata faatino i le vaiaso na te’a nei.
Le afioga i le tamaitai Palemia, afioga Fiame Naomi Mataafa.
O le masina o Me o le tausaga nei e talimalo ai Samoa i le fonotele a atunuu o le Pasefika o le a solaupule ai polokalame ma atina’e mo le faaleleia ma le siitia o le a’oa’oina ma le puipuiamalu o le ola tuputupu a’e o fanauiti.
O le Matagaluega o Tina ma Tamaitai Atina’e o Afioaga ma Agafesoota’i o loo fitoitonu iai le polokalame ua aiaia ai fuafuaga o le Faatonu Folau o le toe tapu’eina o olaga amata o fanau a le atunuu.
