O le Talomua a afioaga o Siupapa ma Saleapaga i le itumalo faapalota o Lepa na molimauina ai i le ‘oa o atina’e tau faato’aga a lea vaega o le motu o Upolu i le atu Aleipata i manu papalagi poo povi.
Ua molimauina foi tasi lea faaitu e to’atele i latou o loo atina’eina manu papalagi talu mai lava tausaga ua tuanai ma o loo faaauau pea. O Saleapaga ma Si’upapa o nisi o afioaga sa lelei faato’aga talo sa la’u i fafo a o lei aafia le talo Samoa i le lega ma sa tafe atu ai faamanuiaga tau seleni i aiga ma fesoasoani malosi i atina’e fai ma faalavelave masani.
O le Talomua i le Aso Toonai na te’a nei sa toe molimauina ai le toe siitia o ia taumafaiga tau faato’aga ma lafu manu a ia nuu o le itumalo faapalota o Lepa, e pei ona sa masii le Minisita ma sui o le Matagaluega o Faato’aga ma Faiga Faiva latou te molimauina.
