E leai ni faalavelave matuiā na tutupu i le aso tonu o le Kerisimasi i Samoa ae na o mataupu tau i tagata avetaavale sa tagofia le ‘ava malosi.
Ua faailoa lea tulaga e leoleo i se lipoti i le tuana’i o le Aso Lulu o le Kerisimasi, ma faailoa ai foi ni osofa’iga se lua a leoleo na maua ai ni laau malosi e le faatagaina i Samoa ma pauta o loo masalomia o ni nakoti.
E to’alua ni alii ua nofo taofia ai i le vaaiga a leoleo mo su’esu’ega, ma le faamoemoe e tula’i i la’ua i le faamasinoga i le masina o Fepuari o le tausaga fou.
Ua faailoa foi e leoleo le lipoti atu o se soifua ua fano i se mataupu tau i le pule i le ola o se tama tane e 39 tausaga le matua.
O loo faaauau pea le tiute faapitoa a malu o le Malo mo aso fiafia e pei ona faatino i tausaga uma pe a oo i le vaitau o le Kerisimasi ma le Tausaga Fou.
