O le talosaga ua taoto nei i le faamasinoga sili a le atunuu ua faaulu e nisi o matai o le afioaga o Laulii, e mafua i le suafa o le Sa’ofaapito ia Leniu Vainiu Te’o ma nisi matai ua faaopoopo i pepa o le lesitala o fanua umia saoloto o le afioaga e silia i le 2 fitu selau eka, lea o loo aofia ai ma se vaega o eleele o loo lisi e se kamupani vilimaa.
Ua oo le tasi o finauga o lenei mataupu i se talosaga na tuuina atu e se vaega toatele o matai o le nuu sa finauina ai se poloaiga lē tumau a le faamasinoga poo se interim injunction e faailoa uma atu ai tupe ma le aofaiga o le totogi o le lisi o fanua o loo faaaogā mo le vilimaa.
Sa finauina ai foi le taofia o le lisi o eleele e tusa ma le 51 eka ua mae’a tuu iai suafa o nisi o matai o le nuu faatasi ai ma alii ma faipule mo le lisiina atu i le kamupani vilimaa.
O Mati o le tausaga na tea nei na faatino ai le sainia o pepa uma o le lisi.
O le mae’a o le suesueina o le talosaga lenei ua teena ai le faia o se poloaiga lē tumau, ua mafua ona e lē o auai le kamupani o le LJ o loo faamauina i le lisi, i le ma le tasi o itu tāua ma ma’ale’ale e ono taofi e le Faletupe o Atinae o Asia e ana le poloketi o loo faigaluega ai le vilimaa o le China Harbour mo le galuega o le toe faaleleia o le uafu tele i Apia.
Ua ioe le faamasinoga a iai nisi tulaga e aliali mai o le a faamuta loa lea galuega e le Faletupe o Atina’e o Asia o loo faatupeina i se fesoasoani mo le Malo o Samoa ma e ono feagai ai i latou e ana le talosaga ma nisi tulaga faaletulafono.
O le teena o le faia o se poloaiga lē tumau, ua tālia ai nei se aso e toe fofogaina ai le talosaga a se vaega toatele o matai o Laulii o loo latou fesiligia ai le tuuina o le suafa o le afioga Leniu Vainiu Te’o ma nisi o matai i le lesitala o fanua umia saoloto e silia i le 2 afe fitu selau eka o loo i tuāmaota o le afioaga.
