O le ogatotonu o lenei vaiaso ua toe faaauau le faamasinoga o Afualo Daryl Mapu ma le tamaitai o Marie Fanueli, o nisi sa faigaluega i le ofisa o faigapalota, o loo tuua’ia i le umia o le pauta faasāina o le ‘aisa, umia o laau malosi ma le umia o ututau faapea paipa e fesootai i le faaaogāina o fualaau faasāina.

Ua toe faagasolo lenei faamasinoga ina ua lē talia ai le talosaga a Daryl Mapu na finauina e lana loia, e leai ni mau a leoleo e faamaonia ai o ‘aisa, o laau malosi, paipa ma ututau o ni meatotino a lē ua molia.

O le lē taliaina e le faamasinoga o lea finauga a Daryl Mapu ma lana loia o le a valaau ai e le itu tetee le molimau a se taulealea o loo finauina e lē ua molia e faapea o ia tonu lea e ana pauta faasāina o laau malosi ma isi vaega sa maua e leoleo i le latou osofaiga i le fale o Daryl Mapu ia Tesema o le tausaga e 2021. O le galuega lea a leoleo o se raid na maua ai i la’ua e to’alua ua molia i le fale i le taimi o le osofaiga.