Ua teena e le iuni o le toese I Paremoremo faamatalaga ua sau ma le ripoti a le komesina o sulufaiga
O le ripoti ua faalauiloa I le vaiaso nei o loo taua ai e oo atu I le ta’i 23 itula o loo loka ai pagota I totonu o sela
O le aso muamua o le masina lenei na faateia ai le toese I Paremoremo I se asiasiga e le I faalauiloa a le komesina, Peter Boshier ma ua faailoa le faateia ma le le fiafia ona o le le lelei ona vaaia o pagota
Peitai ua tali le Peresetene o le asosi o falepuipui, Alan Whitley, afai e moomia e pagota nei le fai faalelei o I latou, e tatau foi la ona usitaia ma mulimulitaia faatonuga, aua o le mea moni e le mafai ona tuufaatasi ma isi pagota pe a leai se suiga, ona e manumanu foi I le saogalemu
Sau foi I le ripoti a le komesina le le lelei o le aufaigaluega a le toese aemaise o le vevela o potu
Ae mai ia Whitley, o loo iai lona faatuatuaga o loo lelei ona faatautaia galuega a le aufaigaluega lea o loo gafa ma le toatele o pagota faigata
E talitonu le komesina I lana ripoti ua faailoa ua le ausia e le pulega o le toese le mafuaaga na ala ai ona faia faapitoa le toese lenei I Paremoremo mo le toe fotua’i o soifua o pagota ma polokalame faaleaoaoga O le asiasiga a le komesina o le asia lea pe ua faaaoga e le pulega o le toese fautuaga na ia tuuina atu iai I le amataga o le tausaga
