Ua teena e lē sa avea ma Palemia o Ausetalia talu ai o Scott Morrison faamatalaga ma tuua’iga faasaga ia te ia e faatatau i lona tauaveina ai o nisi o tofi minisita a o avea o ia ma Palemia ae aunoa ma se silafia e le Palemene aemaise foi o lana lava Kapeneta.
O le faamatalaga a Morrison sa faia i luga o le leitio 2GB i Sini na ia faailoa ai sa ia tauaveina matafaioi ia ona o le tetele o tulaga na feagai ai aemaise lava o le taimi o le pepesi tele o le faama’i. Ua ia faailoa ai foi ua misi ia te ia ona faailoa lea tulaga i le Kapeneta ae fai mai o nisi taimi e galo ia tatou mea na fai i le lua tausaga talu ai ma o taimi faigata foi.
Na ia ta’ua foi na te lei lagona e mana’omia ona faailo faalauaitele ia tulaga faaopoopo sa ia tauaveina aua e le’i faaaogāina lava ia malosiaga peitai fai mai lē sa avea ma sui palemia talu ai Barnaby Joyce sa faaaogā e Morrison le malosiaga lea faaminisita i le resources e taofi ai se poloketi tau kesi sa fuafua mo gataifale o Niu Sa Uelese lea sa lē lagolagoina.
Na faailoa foi e le minisita o tupe sa iai i le faigamalo talu ai e na te lei iloaina foi o loo share le la tofiga ma le Palemia auā o le isi lea matagaluega sa faaminisita ai foi e Morrison ia lava e aunoa ma se iloa e le minisita na tulai mai i le tofi i lea taimi. Fai mai le Palemia i le taimi nei, Albanese, ua tatau ona faamavae Morrison mai le tofi faipule o loo ia tula’i ai nei.
