E teena e le pulega a le kolisi maualuga a Manurewa High School faamatalaga a se tasi o matua e faapea e lei vela moa o meaai a fanau aoga o loo tufa fua.
Ua lipotia e le Herald le molimau a le tina o loo faaseā, e le o le uluai taimi lenei ua faaseā atu ai lana tama teine i moa e lei vela o loo tufatufaina mai i meaai a fanau aoga.
Ina ua faafesootai e le tina le aoga e mata moa, o le tali na tuuina mai o lea lava sa vela lelei moa ma na tapenaina foi e fua agai i taiala mai le soifua maloloina.
O le fonotaga foi na talo e feiloai ai le tina, puleaoga ma le sifi kuka, na faailoa ai e le sifi kuka e eseese uma lava faiga e kuka ai e tagata moa.
I ata o moa na pue e le tamaitai aoga ma toe faasalalau i luga o le Herald o loo iloa ai e lanu piniki totonu o le moa.
O le vaiaso talu ai na faamalolo ai e le matagaluega o aoga le kamupani na gaosia meaai a le kolisi o Kaitaia ae faasolo suesuega ona o moa mata na mamai ai ma nisi o fanau aoga.
