Teena e le minisita o leoleo le tuai ona faafaigaluega o nisi leoleo

E lē o taliaina e le minisita o leoleo, Poto Williams faamatalaga ua faatetele vesiga a kegi i Aukilani ona ua televave atu le faafaigaluega o tagata e o i kegi na i lo le faafaigaluega o nisi leoleo.

O le mau lea a se tasi o ta’ita’i fesoota’i ma kegi Billy McFarlane i le mae’a lipotia mai ai o isi fale na tafana i le po o le Aso Lulu, mai ia McFarlane o loo iai faamaoniga ua vave atu ona faafaigaluega tagata e kegi na i lo le faafaigaluega o leoleo.
Tali a le minisita, e lē sa’o nei faamatalaga ma o lea lava foi o loo tali mai leoleo i osofaiga o loo tutupu.
I faamaumauga a Poto e 14,000 leoleo o loo galulue i soo se vaega o le atunuu.

A o teena ai la e Poto, mai le asosi o leoleo o loo ia tuua’ia taugafana o loo faia nei i Aukilani faapea Far North i kegi a le Tribesmen ma le Killer Beez, ma e lē fou le va o kegi nei e lua e pei ona faamaonia mai e le peresetene o le asosi Chris Cahill.

Ae mai se tasi o sui ua leva ona iai i le kegi a le Black Power i tala a le Newshub, Dennis O’Reilly, o le aafia o fale o aiga ona o le va o kegi ua tatau ona tuu.