Ua tali le Minisita o Faatoaga ma Faigafaiva i se tuuaiga ua lipotia ai le iai o sona aafiaga i lona tulaga o se minisita o le Malo, i le faatuina o le pisinisi e faatafafaoina tulisi mai fafo le Samoa Royal Tour, lea o loo lotolotoi ai ma nisi o ona alo.
O le Aso Sa na tea nei na taunuu ai le uluai malaga tuusa’o mai Saina a se vaalele la’upasese o lea atunuu ma se aumalaga e silia i le toa 200 lea o loo feagai nei lea pisinisi ma le faamaimoaina i itu eseese o le atunuu ma le faamoemoe e malaga i Savaii i le faaiuga o le vaiaso nei a o lei toe tuua Samoa.
Ua faaalia e le Minisita le susuga Laauli Leuatea Polataivao Fosi Schmidt i le auala o fesootaiga o le BlueTV, o nisi o tagata palota o lona itumalo ma ona alo o loo faagaioia le Samoa Royal Tour, ae e le o ia.
Na ia faailoa foi i lea auala o faasalalauga i luga o upega tafailagi e leai se tupe a le malo o alu ai, e faapena foi ona leai se sootaga o le kamupani i Hong Kong na tapenaina le malaga ma le Malo.
Le susuga Laauli Leuatea Polataivao Fosi Schmidt.
O le taunuu ai o le uluai malaga mai Saina ua faamoemoe e tasi le malaga i vaiaso uma, ma o se avanoa lelei foi mo le aveina o oloa eseese mai Samoa e aofia ai fua o faatoaga e faatau i maketi i Saina.
