Ua teena e le afioga ia Vui Clarence Nelson le talosaga a le itu a leoleo e iloilo faatasi e le faamasinoga le mataupu a Malele Paulo ma Lema’i Faioso Sione ma Talalelei Pauga.
Faailoa manino e le afioga ia Vui e leo mafai e le itu a leoleo ona faamautu atu i le faamasinoga se aso e aumai ai Talalelei Pauga o loo nofomau i Ausetalia o lona uiga o le a umi se taimi e faatali ai Malele ma Lemai.
Faailoa manino e Vui o Malele Paulo e le nofomau i Samoa nei o se tagatanuu o Ausetalia ma ua umi ona aumau iinei ona o le poloaiga a le faamasinoga, e le gata i lea o le a aafia ai foi ma aiā tatau a i laua o loo tuuaia pe afai ae talia le talosaga a le itu a leoleo.
Na teena e loia a Malele Paulo ma Lemai Faioso Sione le talosaga a le itu a leoleo, ona o loo finau mai i latou o loo iai foi mataupu faaletulafono o loo mafua ai ona taofia Talalelei Pauga i Ausetalia.
Ua 4 tausaga talu ona faia moliaga a leoleo e faasaga ia i laua ia ma ua leva ona maea tapena a latou itu mo le suesuega a le Faamasinoga.
O le masina o Aokuso i le tausaga e 2019 na molia ai i laua ia faatasi ai ma se tasi o alii ia Taualai Leiloa ua maea ona faia iai e le faamasinoga le faaiuga ina ua ia ioeina moliaga ma o loo tuli lona faasalaga i le toese i Tanumalala.
E oo mai i le taimi nei e leo mautū lava se faamatalaga pe aumai Talalelei Pauga pe leai e tulai i luma o le faamasinoga a Samoa e tali i moliaga o loo tuuaia ai.
Ae mo Malele Paulo ma Lemai Faioso Sione o le Aso 13 o Mati o le a amata iloilo ai loa e le faamasinoga le la mataupu.
